Forex ni iki?

Forex ni iki?

Forex ni impfunyapfunyo y'amajambo y'icongereza Foreign Exchange, asobanura guhanahana amafaranga y'ibihugu bitandukanye.

Mu buryo bworoshe, ni isoko aho amafaranga nk'Idolari rya Amerika (USD), Euro (EUR), Pound y'Ubwongereza (GBP) canke Yen y'Ubuyapani (JPY) agurwa kandi akagurishwa.

Abantu bamwe baja kuri Forex kugira bahindure amafaranga kubera ingendo canke ubudandaji. Ariko abadandaza (traders) bo baba bagiye kurondera inyungu mu guhanahana ayo mafaranga igihe ibiciro vyayo bihinduka.

Forex ikora gute?

Kuri Forex, ntugura ifaranga rimwe gusa. Wama ugura ifaranga rimwe kandi ukagurisha irindi igihe kimwe.

Nk'akarorero, iyo uguze EUR/USD, uba uguze Euro kandi ugurishije Idolari rya Amerika.

Iyo Euro iduze agaciro ugereranije n'Idolari, ushobora kuyigurisha ukaronka inyungu. Ariko iyo igiciro cayo gimanutse, urashobora guhomba.

Ni co gituma abadandaza bama bagerageza gusesangura isoko imbere yo gufata ingingo.

Ni bande bari mw'isoko rya Forex?

Abantu benshi bibaza ko Forex igizwe n'abantu bicaye imbere y'imashini nyabwonko gusa. Mu vy'ukuri, iryo soko rihuza abantu n'ibigo vyinshi.

Harimwo:

Amabanki akomeye yo kw'isi. Amabanki makuru y'ibihugu. Amashirahamwe akora ubudandaji mpuzamakungu. Abanyamitahe. Abadandaza ku giti cabo (Retail Traders).

Ivyo bituma Forex iba isoko rinini kurusha ayandi yose.

Mu buzima busanzwe

Dufate ko ufise 100.000 BIF ugaca ugura umwimbu w'ikawa wizeye ko mu mezi abiri uzoba ufise agaciro kanini.

Mu nyuma, igiciro cawo kiraduga ushobora kuwugurisha ukunguka.

Trading ikurikiza iyo ngingo nyene. Itandukaniro ni uko aho kugura ikawa, uba ugura kandi ugurisha amafaranga y'ibihugu

Mbega Forex si akamari?

Iki ni kimwe mu bibazo bikunze kubazwa.

Oya. Forex ubwayo si akamari. Ni isoko ryemewe rikoreshwa buri musi n'amabanki, amashirahamwe hamwe na reta.

Ariko rero, iyo umuntu yinjiye muri Forex atavyo yize, akaja gufata ingingo zishingiye ku mahirwe gusa, uburyo ariko arakoresha bushobora gusa nk'akamari.

Ni co gituma kwiga imbere yo gushiramwo amafaranga ari ikintu gihambaye.

Ibintu ukwiye kwibuka Forex ni isoko ryo guhanahana amafaranga y'ibihugu. Ni ryo soko rinini kurusha ayandi kw'isi. Wama ugura ifaranga rimwe kandi ukagurisha irindi. Ushobora kunguka canke ugahomba bivanye n'ihindagurika ry'ibiciro. Kwiga ni yo ntambwe ya mbere imbere yo gutangura gucuruza.

Ikosa rikunze gukorwa

Abantu benshi batanguza Forex bumva ko ari uburyo bwihuse bwo kuba umutunzi.

Mu vy'ukuri, Trading ni ubumenyi bwigwa buhoro buhoro. N'abadandaza b'abahinga bararonka ibihombo rimwe na rimwe. Igitandukanya abatsinda n'abandi ni uko bamenya gucungera ingorane no gufata ingingo zishingiye ku bumenyi aho gukurikira amarangamutima.

Wari ubizi?

Isoko rya Forex rikora amasaha 24 ku musi kuva ku wa mbere gushika ku wa gatanu. Ibi bishoboka kubera ko igihe amasoko yo muri Aziya afunze, ayo mu Buraya canke muri Amerika aba ariko arakora.

Ibibazo bikunze kubazwa

Mbega nkeneye amafaranga menshi kugira ntangure Forex?

Oya. Hari ama broker yemera ko umuntu atangura n'amafaranga make. Ariko gutangura n'amafaranga make ntibikuraho ingorane zo guhomba.

Mbega ndashobora kwiga ntarashiramwo amafaranga?

Ego. Abenshi batangurira kuri Demo Account, ibafasha kwimenyereza Trading bakoresheje amafaranga ya feki.

Mbega Forex ikorera ahantu hamwe?

Oya. Forex nta nyubakwa imwe ifise. Ni isoko rikorera kuri internet, rihuza amabanki n'ibigo vyo hirya no hino kw'isi.

Mbega umuntu wese yoshobora kwiga Forex?

Ego. Ariko bisaba kwihangana, kwiga no kwimenyereza. Nta muntu acika umuhinga mu musi umwe.

Amajambo mashasha Forex: Isoko ryo guhanahana amafaranga y'ibihugu. Foreign Exchange: Amazina yuzuye ya Forex. Trader: Umuntu agura kandi akagurisha ku masoko y'ivy'ubutunzi. Broker: Isosiyete igufasha gushika ku isoko rya Trading.